المرجيحه

يا عم ادريس
يا عم ادريس
يا بو المرجيحه و القواديس
ما جاش الدور ؟
عشان يطلع قادوسي لفوق
أبوس النور
و اطفّي للعلالي شوق
و اغني ف الهوي موال
على ورد الخدود و الخال
و ادوق الحب سحر حلال
و اشوف الدنيا و ابقى عريس
يا عم ادريس
يا عم ادريس


يا عم ادريس عليَّ الدور
أدور و اطلع مع الطالعين
كفاية سنين يا عم ادريس
يا عم ادريس

كفاية سنين


و انا و عيال كما العصافير
رفاقة كلنا و فرافير
يا دوب يعلا الجناح بينا
يعدينا القادوس و يطير
و نرجع تاني
لا فرحنا
و لا عرفنا الطريق من فين
و جينا زي ما رحنا
حيارى و محرومين لاتنين
نداوي بالغنا جراحنا
و نرمي اللوم على الجناحين
و جرح النفس له وجعين
يبكّي القلب
قبل العين
و قاضي الحظ له شرعين
لأهل البخت
و المتـــاعيس
يا عم ادريس
يا عم ادريس

وآه لو بختنا يشوفنا

ونرمي الزهر يدينا

وقاضي الحظ ينصفنا

ويحكم بالأمل لينا

ونتمرجح علي كيفنا

وينساب القادوس بينا

ياخدنا بعيد ويحدفنا

وعند الشمس يرمينا

علي بحر النسيم نسبح

وتسرح فيه أمانينا

وفوق شط النجوم ننزل

وترسي هناك مراسينا

ويبقي الجو هُلِّيلة

تلعلع فيه غناوينا

ونبدر في الفضا حبه

غناوي كلها محبه

تقول للهم يتخبي

وترقص في الهوي الفوانيس

ياعم ادريس

يا عم ادريس

أحمد فؤاد نجم

صوت أمل جمال

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *